लटरम्म फल लागेपछि
हाँगालाई लाग्यो, जरा बेकारको छ
हाँगाले सोच्यो
जरा अदृश्य मात्रै छैन
निकम्मा पनि छ
उसलाई अहिलेसम्म जराले
एउटै फल दिएको पनि सम्झना छैन
ऊ जराले
उदाउँदो सूर्य
चिसो बतास
पूर्ण चन्द्र
रंगीबिरंगी फूल
रसिला मान्छे
चराको चिर्बिर
सप्तरंगी इन्द्रेणी
केही देख्न र अनुभूत गर्न नपाएकोमा
एक ‘कुरूप हाँसो’ हाँसिरहन्छ ।
हाँगालाई लागेको छ
जरा फगत गुमनाम गाडिएको छ
कसैले त सुनाइदेऊ
जरा गाडिएकै भएर हाँगो
‘हाँगो’ भएर हल्लिएको हो ।