कतै बिर्सिएँ कि भनेर हौली
उतै सुदूरबाट घरीघरी पठाउँछ्यौ बाँडुली !
र सपनामा
तिमी आफैँ कसरी हो कसोरी आइपुग्छ्यौ
मेरो मध्यरातको मस्त निद्रा भत्काउँछ्यौ
यी टाढाका सपनाभन्दा त प्रिया !
कुनै दिन तिम्रै आँखाबाट
देखेका सपना पो विशेष लाग्थे
र त ती दिनहरू खास्साका थिए,
तर एउटै कुरा थाहा भएन दुवैलाई
तिमी पृथ्वीको कुन अक्षीय यात्री थियौ ?
या थिएँ मै !
त्यसैले हामी कहिल्यै नभेट्ने ध्रुवहरू भयौँ
ठीकै छ अब तिमी जता हौ
यो झरना, खोला र पाखापर्वतहरूलाई
साक्षी राखेर
यहाँ,
यी बाँडुली सपनाहरूको अर्थ यसरी लगाएको छु
कि–
तिमी आजीवन यसै गरी
आफ्ना सम्झना नवीकरण गरिरहनेछ्यौ ।
हाल दक्षिण कोरिया