• वि.सं २०८० चैत १५ बिहीबार
  • Thursday, 28 March, 2024
केरुङ हाङ्सेम
२०७६ भदौ ७ शनिबार ०८:०२:००
साहित्य

ओ पृथ्वीवासी, यो पृथ्वी कसको हो ?

कविता

२०७६ भदौ ७ शनिबार ०८:०२:००
केरुङ हाङ्सेम

‘ओ पृथ्वीवासी !  यो पृथ्वीचाहिँ हो कसको ?’

तागतको परिधिमा च्याप्टिएर
समयको तुरुङ्ले 
निःसन्देह बाँधिरहेछन् पाइलाहरू । 

शासन–सत्ता भागबन्डामा 
चोक्टा–चोक्टा पारिएको यो पृथ्वी,
मान्छेत्व च्याम्बरमा खाँदिएको छ ।
कति टाढाको नापोले खुम्चिएर
भेट्न खोज्दै छ मान्छे एक जुवा माथि पुगेको जून !

मान्छेहरूका तागतको आयतनले 
हत्केलामा फनफनी घुमिरहेछ एउटा ग्लोब, 
ज्याकमा, विलगे्रट्स ...! 
झोलाभरि खाँदेर पृथ्वी 
सवार भई रहेछन् ब्ल्याकहोलको हटियामा । 
भोको पेटका गीतहरूले लिलाम गर्दै छन्
आफ्नै सुमधुर संगीत !

अमेरिकाबाट उडाइएका सेता चिलका बथानले 
औषत आयुको सीमारेखामा टेकेर 
युद्धको गीत गाइरहेका छन् ।
 कति न शान्तिको नांगो भाषणबाट आजित भएका
 एक हुल मान्छेहरू आजै मात्र सीमा पार गरेर
 शरणार्थी शिविरमा समयको मृत्यु कुरिरहेका छन् ।
 साँच्चै ! हाम्रो जिन्दगी कसको हत्केलामा
 छमछमी नाचिरहेको छ हँ ?

तान्त्रिक विचारका वादशाहहरूले मन्त्र फुकेपछि
युगको तीखो धारमा टेकेर उभिएको छ पृथ्वी 
धर्मग्रन्थका नांगो शब्दहरूले
मान्छेहरूको गिदी अपहरण गरिरहेको छ ।
धर्मगुरुहरू मिसाइलको स्विच हातमा लिएर 
धार्मिक प्रवचन दिइरहेका छन्,
‘अचेल बुद्धको निधार खुम्चिँदै गइरहेको छ ।’
आत्मरतिको खेलमा रमाइरहेका महामानवहरूले 
भ्रमित युगको आँगनबाट गाइरहेका
छन् श्रद्धाञ्जलीको गीत

बाँच्नुको बेस्वादिलो अनुभूतिले स्वप्नहरू सापट लिएर
प्रतिबन्धित पाइला चालिरहेका छौँ ।

हाम्रा प्रत्येक सपनाहरू विश्वबैंकमा बन्धक छन् 
हाम्रा प्रत्येक स्वतन्त्रताहरू कोकाकोलाको बोटलमा कैद छन् 
हाम्रा प्रत्येक आत्मसम्मानहरू फाँसीमा चढिरहेका छन् ।

फगत दर्शनको काँडेतारले बाँधिएको हाम्रो मस्तिष्क
आत्महत्याको महामेलामा दौडिरहेछ ।
फ्युजन ‘फेन्टासी’को नामर्द आदर्शले 
चेतनामाथि हस्तक्षेप गरिरहेको छ ।

– ओ पृथ्वीवासी ! यो पृथ्वीचाहिँ हो कसको ?

विभेदका अग्ला पर्खालको छायाले 
आक्रान्त भएका छन् भुइँ मान्छेहरू,
पसिनाले समय मुछेर
एडिक्ट युगसँग जोरी खोजिरहेका मजदुरहरू
बहुराष्ट्रिय कम्पनीले दिएका बिमापत्र सिरानी लाएर 
सडकमा लस्करै सुतिरहेका छन् ।

तर, आज 
हो, आज जुलुस छ
मुक्तिको जुलुस छ
एक टुक्रा क्रान्ति हत्केलामा बोकेर
तमाम पृथ्वी नचाउनेहरूलाई निमिट्यान्न पारूँ
बन्दीगृहबाट मुक्त गर्दै यो पृथ्वी 

ओ पृथ्वीवासी ! अब यो पृथ्वी हाम्रो बनाऊँ !