• वि.सं २०७८ असोज १० आइतबार
  • Sunday, 26 September, 2021
लोक लामा
२०७८ श्रावण २ शनिबार ११:५५:००
साहित्य

कविता : यात्रामा

२०७८ श्रावण २ शनिबार ११:५५:००
लोक लामा

यात्रामा 
सपना बोकेर हिँड्दा 
मलाई तिमीले 
बदमास
अराजक 
देशभँडुवा भन्यौ ।

 

मसँगै यात्रामा 
गाउँ, शहर, बजार थियो 
फुलिरहेको फूल थियो— हिमालमा 
झुलिरहेको धान थियो— मधेसमा 
गल्ली, चोक र डाँडापाखाहरू थिए 
ती सबलाई तिमीले 
स्वर्गझैँ सुन्दर देख्यौ
तर, मलाई कुरूप । 

 

यात्रामा मैले 
पुर्खाहरूको लुटिएको कथा देखेँ 
काटिएको नाक 
अपहरण गरिएको सभ्यता
बेचिएको मान्छेको क्रन्दन देखेँ 
तर, त्यसलाई तिमीले 
आफ्नो गौरवमय इतिहास देख्यौ 
र, मलाई अराष्ट्रिय तत्व । 

 

मेरो रोदनलाई बारुद 
मेरो चित्कारलाई बम 
र, मेरो अनुनयलाई विध्वंश देख्यौ तिमीले ।

 

वास्तवमा 
तिमी मसँगै थियौ 
तर, यति लामो यात्रामा पनि तिमीले कहिल्यै 
मेरो आँखामा आफ्नो अनुहार हेरेनौ 
केवल हेर्‍यौ मलाई ।

 

ए सहयात्री !
तर, मैले त तिम्रो आँखामा 
पटक–पटक हेरिरहेछु— आफूलाई 
र, देखिरहेछु— 
केवल आतङ्ककारी !

 

भन न 
कहिले देख्नु तिम्रो आँखामा मैले 
उदाइरहेको घाम ?

 

०००

[email protected]
 

चौँरीदेउराली, काभ्रे