यतिवेला उपत्यकाका मुख्य ग्यालरीहरू ४० देशका कलाकृतिहरूले भरिभराउ छन् । ‘काठमाडौं ट्रिएनाले–२०७७’ नाम दिइएको कलाप्रदर्शनीमा १३० जनाभन्दा धेरै कलाकारका तीन सयभन्दा धेरै कलाकृति राखिएका छन् । कलाकृतिहरू विशेषतः आदिवासी समुदाय, जलवायु परिवर्तन, लैंगिकतालगायतका विषयमा केन्द्रत छन् ।
कलाकृतिहरू उपत्यकाका पाँच स्थानका ग्यालरीमा राखिएका छन्, जसमा, पाटन संग्रहालय, बहादुर शाह बैठक, सिद्धार्थ आर्ट ग्यालरी, नेपाल आर्ट काउन्सिल र तारागाउँ संग्रहालय छन् । हरेक ग्यालरीका चित्रकलाले छुट्टाछुट्टै सन्देश दिन्छ । सिद्धार्थ आर्ट ग्यालरीमा प्राकृतिक विपत्ति र त्यसले निम्त्याउने मानवीय जोखिमका बारेमा कलाकृति राखिएका छन् ।
नेपाल आर्ट काउन्सिलमा आदिवासी र लैंगिक मुद्दामा केन्द्रित चित्रकला राखिएका छन् । त्यस्तै, तारागाउँ संग्रहालयमा पर्यावरण र जलवायु परिवर्तनसँग सम्बन्धित चित्रकला राखिएका छन् । पाटन संग्रहालयमा परम्परागत चित्रकलासँगै हस्तकला र मूर्तिकला हेर्न पाइन्छ । बहादुर शाह बैठकमा आध्यात्मिक र आदिवासीसँग सम्बन्धित चित्रकला हेर्न पाइन्छ ।
प्रदर्शनीमा क्यानभाससँगै डिजिटल प्लेटफर्मको समेत प्रयोग गरिएको छ । ग्यालरीभित्र प्रवेश गर्दा यस्तो लाग्छ, त्यहाँका हरेक कुनाले कलाको माध्यमबाट प्रत्येक आगन्तुकसँग केही प्रश्न गरिरहेको छ ।
प्रत्येक तीन–तीन वर्षमा आयोजना गरिने ट्रिएनाले कोरोना महामारीका कारण एक वर्ष ढिला भएको आयोजकको भनाइ छ । प्रदर्शनीमा कार्यशाला गोष्ठी, छलफल तथा विचारगोष्ठी पनि नियमित रूपमा भइरहेका छन् । सिद्धार्थ आर्ट फाउन्डेसन (एसएएफ)ले माघ २८ देखि सुरु गरेको प्रर्दशनी चैत १७ सम्म सञ्चालन हुनेछ ।
