• वि.सं २०७९ श्रावण २९ आइतबार
  • Sunday, 14 August, 2022
दीपक लुंगेली मगर
२०७९ श्रावण १४ शनिबार ०७:४४:००
साहित्य

पेरुंगो

२०७९ श्रावण १४ शनिबार ०७:४४:००
दीपक लुंगेली मगर

युगौँदेखि
पेरुंगोभित्र बन्धक 
आदिम सिसिफस
पहिचानको संकटमा छ ।
मालिकको निगाहले
निर्मित छ उसको नियति ।

 

च्वाँ–च्वाँ गर्छ
उसको भाषा मालिकले बुझ्दैन ।
चिम्सो आँखाले समानता हेर्न खोज्छ
मालिकले देख्दैन ।
थेप्चो नाकले अधिकार सुँघ्न खोज्छ
मालिकले दिँदैन ।
पुड्को शरीर उठाउन खोज्छ
मालिकले उठ्न दिँदैन ।
पुख्र्यौली माटो जोत्न खोज्छ
मालिकले जोत्न दिँदैन ।
जगरजस्तै कठोर छ उसको मालिक ।
पेरुंगोभित्रै लाद्छ
समावेशी निरंकुश कानुन ।

 

ऊ सम्झन्छ 
आदिम पुर्खाहरूले
आफ्नै स्वायत्त माटोमा
चरन गरेको इतिहास ।
ऊ सम्झन्छ
आदिम पुर्खाहरूले
वनजंगल र 
खोलानालासँग रचेका
कथाहरू ।


तर आज
आफ्नै अगाडि देख्न विवश छ
पुख्र्यौली जंगल हडप्ने मालिक
मालिंगो मासेर 
पेरुंगो बनाइरहेछ ।
विभेदको भाला रोप्न
लालायित निरंकुश मालिक ।