• वि.सं २०७९ माघ २२ आइतबार
  • Sunday, 05 February, 2023
कविता बाहिङ
२०७९ माघ ७ शनिबार ०७:३८:००
साहित्य

हिसाबकिताब हुनुपर्छ

२०७९ माघ ७ शनिबार ०७:३८:००
कविता बाहिङ

महोदय,
यो राम्रो सहरको तस्बिरमा
तिम्ले कति नराम्रो निर्मम
पीडाहरूको रंग लगाएका छौ,  
त्यो हिसाबकिताब हुनुपर्छ ।

 

यो सुन्दर सहर निर्माण गर्दा तिम्ले 
लुछेको भोका गाँसहरूले 
कतिको सास चुँडाएका छौ ? 
यो सडक जुन टिलिक्क देखिन्छ, 
ती चमकदार सडक टल्काउँदा तिम्ले 
भत्काएको झुप्रोहरूमा 
कतिको वास निमिट्यान्न परेका छौ ?
त्यो सब हिसाबकिताब हुनुपर्छ । 

 

यो हरियाली सडकपेटीहरू सजाउँदा 
तिम्ले बीभत्स लुछेका भूमिले 
कतिका निद्रा खलबल्याई उजाड बनाएका छौ ?
यो नमुना नगरी बनाउन तिम्ले 
निर्मम खोसेको अस्तित्व, 
इतिहासमा विलीन मानवताले 
कतिका सपनाहरू तिलाञ्जली चढाएका छौ ?
त्यो सब हिसाबकिताब हुनुपर्छ ।

 

यो सुविधासम्पन्न सहर स्थापनार्थ 
तिम्ले बिर्सेका दायित्वमा अनदेखा भई
अनुपस्थित उद्घोष गरिएका अधिकारहरूले 
कतिको शरीर शक्ति
निरर्थक प्रमाणित गराएका छौ ? 
तिम्रो ‘कु’मा आधारित
‘सु’शासन प्रचलनमा तिम्ले
अन्धाधुन्ध चलाएका निरंकुश कानुनले
मानहानिमा परेका 
कतिका मुद्दाहरू लाचार साबित गराएका छौ ? 
त्यो सब हिसाबकिताब हुनुपर्छ ।

 

यो समृद्ध तिम्रो मुलुक घोषणा गर्न तिम्ले 
चलाएका दानवी पाइलाहरूले 
घाइते परेको मनोबलहरूमा
कतिका भरोसाहरू विचलित तुल्याएका छौ ?
यो महल जुन पुँजीपतिको मात्र हो,
त्यो महललाई सानदार बनाउँदा तिम्ले 
दलेको स्वर्ण लेपनले सोसेका रगतहरूमा 
कतिका आशाहरू बगाएका छौ ? 
त्यो सब हिसाबकिताब हुनुपर्छ ।

 

हो, 
यो ‘तिम्रो’ राम्रो सहरको तस्बिरमा तिम्ले 
कति नराम्रो पीडाहरूको रंग लगाएका छौ 
त्यो सब सब हिसाबकिताब हुनुपर्छ