नदी र किनारहरू
दुई किनारहरूले सोचे
नदीले हामीलाई कहिल्यै मिल्न दिएन ।
अन्ततः
षड्यन्त्र गरेर उनीहरूले नदीको हत्या गरे
जति वेला नदीको हत्या भयो
ठीक त्यही वेला किनाराहरूको अस्तित्व पनि सदाका लागि समाप्त भयो ।
पिँजडा
पिँजडा त पिँजडा हो
आस्था, विचार होस् या सिसाको
जहाँबाट संसार देख्न त सकिन्छ, तर मुक्त हुन सकिँदैन ।
उता
पुतली, माहुरी, चराहरू छर्लङ्गको भ्रममा
सिसाको झ्यालबाट बाहिरिन खोज्दा
जसरी पटक–पटक ठोक्किएर घाइते हुन्छन्
र मर्छन्, विडम्बनाको अकाल मृत्यु
यता
आस्था, विचारको झ्यालबाट उसै गरी देखिन्छ भ्रामक स्पष्टता
ठोकिन्छन् मानिसहरू पटक–पटक र ढल्छन्, व्यर्थ मृत्यु
पिँजडा त पिँजडा हो
आस्था, विचार होस् या सिसाको
जहाँबाट संसार देख्न त सकिन्छ, तर मुक्त हुन सकिँदैन ।